1 дүгээр сарын 26-ны Америкийн элчин сайдын яамны холбогдох төлөөлөгчид Замын-Үүд суманд хүрэлцэн ирж, Засаг дарга М. Баянмөнхтэй уулзаж, АСЕМ-2016 болон Замын-Үүд сумын хөгжлийн талаар санал солилцлоо. Мөн АСЕМ-2016 Монгол улсад болохтой холбогдуулан ИХШХЕГ-ын албан хаагч нарт Англи хэлний сургалт явуулж буй бөгөөд сургалтыг газар дээр нь хүрэлцэн ирж үзэх, Америкийн мэдээллийн төвийн үйл ажиллагаатай танилцахаар энэ удаагийн айлчлалыг хийсэн байна.
Уулзалтын үеэр Замын-Үүд суманд АНУ-ын 100 хувийн хөрөнгө оруулалтаар цэцэрлэг барих ажлын санхүүжилт бүрэн шийдэгдсэн, ойрын хугацаанд мэргэжлийн инженер явуулж, газар дээр нь очиж, судалгаа хийлгэх болсныг мэдэгдсэн байна. АНУ-ын ЭСЯ нь Монгол улсын хэмжээнд 4 цэцэрлэг барих бөгөөд үүний нэг нь Замын-Үүд сумын иргэд, хүүхэд багачуудад туйлын таатай үйл явдал болоод байна.